TEPANG WENGI

Wengi tadi, Kaulanun

waktos ieu jisim humaroshos

ngaharéwos ka Salira dina jemplingna peteng,

aya isin paeunteung-eunteung jeung reueus.

Isin tos kumawantun sumolondo

bari rébo ngajingjing mangpirang katuna.

Ari reueus téa mah tangtos atuh, Kaulanun,

ieu jisim dipaparin kénéh rohang waktos

kanggo nepangan Salira, sanaos rumaos

remen teu sapagodos sareng papagon Salira.

Wengi tadi, Kaulanun

tos pok deui baé

ieu jisim

ngagalindengkeun paménta,

bari keukeuh teu daék meta.

Euweuh kaéra, panginten saur Salira téh,

jangji-jangi ukur jadi papaés biwir

nu haben dibalur jalir.

Wengi engké, Kaulanun,

boa mun tiasa ieu jisim nepangan deui.

***

Dimuat dina MANGLE No. 2478, 29 Mei - 4 Juni 2014